84:7~15: ئەمەل دەپتىرى ئوڭ تەرىپىدىن ۋە سول تەرىپىدىن بېرىلىدىغانلار

[84:7،8،9] ئەمەل دەپتىرى ئوڭ تەرەپتىن بېرىلىدىغان كىشى ـــ بۇ رەببىگە ئىمان ئېيتقان مۆمىن كىشىدۇر ـــ ئاللاھقا ئاسان ھېساب بېرىدۇ ۋە جەننەتتىكى ئائىلىسىنىڭ يېنىغا خۇشال-خورام ھالدا قايتىدۇ.

    

    [84\10-15] ئەمەل دەپتىرى سول تەرەپتىن بېرىلىدىغان كىشىگە كەلسەك ـــ بۇ ئاللاھنى ئىنكار قىلغان كاپىردۇر ـــ ئۆلۈپ يوق بولۇپ كېتىشنى تىلەپ كېتىدۇ، ئاندىن جەھەننەم ئوتىغا كىرىپ كۆيىدۇ. ئۇ دۇنيادىكى چېغىدا ئائىلىسىدە خۇشال-خورام ۋە مەغرۇر ئىدى، قىلغانلىرىنىڭ ئاقىۋىتىنى ئويلىمايتتى. چۈنكى، ئۇ ھېساب بېرىش ئۈچۈن تىرىلدۈرۈلۈپ رەببىنىڭ ھوزۇرىغا بېرىش يوق دەپ بىلەتتى. ياق! ئاللاھ ئەلۋەتتە ئۇنى باشتا ياراتقىنىدەك يېڭىدىن يارىتىدۇ ۋە قىلمىشلىرىنىڭ جازاسىنى بېرىدۇ. شۈبھە يوقكى، رەببى ئۇنى ياراتقان تۇنجى كۈنىدىن باشلاپ تاكى تىرىلدۈرىلىدىغان (قىيامەت) كۈنىگىچە ئۇنىڭ ھەر-بىر ھالىنى كۆرۈپ تۇرماقتا ۋە بەك ياخشى بىلىپ تۇرماقتىدۇر.